Siglir tar il cuntegn

Engiadina Charta a la regenza procura per opposiziun en Val Müstair

Dacurt han l’uniun da gastronomia e l’uniun da commerzi e mastergn da la Val Müstair scrit ina charta a la regenza grischuna. En quella fan els attent ch’il center da requirents d’asil a Valchava fetschia donn a la populaziun ed al turissem en la val.

En la chasa Muntanella a Valchava vivan radund 45 requirents d'asil.
Legenda: En la chasa Muntanella a Valchava vivan radund 45 requirents d'asil. RTR, D. Spinnler

Dacurt avevan las duas uniuns da la Val Müstair, la gastronomia sco er da commerzi e mastergn scrit ina charta a la regenza dal chantun Grischun. En quella fan els attent sin la situaziun en Val en connex cun il center d’asilants a Valchava.

Il punct da critica central è ch’ils giasts ch’arrivian en Val Müstair sajan schoccads e consternads e che l'attractivitad da la Val Müstair sco lieu turistic sa sbassia da maniera massiva. Quella charta e vegnida scritta be da la suprastanza.

Opposiziun da commembers da commerzi e mastergn

Sa distanzià da questa charta è d’ina vart la Biosfera Val Müstair sco er Arno Lamprecht, il president da la vischnanca Val Müstair. Plinavant hai er dà differents commembers da commerzi e mastergn ch’èn sortids da la societad.

Sco quai che Gabriella Binkert Becchetti, la presidenta da commerzi e mastergn ha ditg, vulan els discutar la tematica a la proxima radunanza che ha lieu ils 25 d’avrigl, sche pussibel er cun las persunas ch’èn sortidas da la societad.

La regenza grishcuna vegn ad infurmar il glindesdì, ils 18 d'avrigl en chaussa, rapporta l'agentura da novitads rumantscha.

RR novitads 06:00