Siglir tar il cuntegn
Inhalt

Engiadina Chantun na vul betg sustegnair concert Openair Lai da Staz

Il Festival da Jazz San Murezzan na vul betg acceptar quella decisiun. L’organisaziun ha perquai inoltrà ina dumonda da reponderaziun.

concert si Muottas Muragl
Legenda: Il concert open air dal Festival da Jazz da San Murezzan - qua l'ediziun 2017 a Muottas Muragl cun Jamie Cullum RTR/David Spinnler

L’Uffizi da cultura ha infurmà ils organisaturs dal Festival da Jazz San Murezzan, ch’els na veglian betg sustegnair il project d’in concert sut tschiel avert ch’è planisà questa stad enturn il Lej da Staz. Quai surtut perquaich’il concert na s’occupia betg da maniera critica cun la cuntrada. Uschia in concert pudess avair lieu dapertut sin il mund, quai in ulteriur argument davart da l’Uffizi da cultura. Era ils custs da 350’000 francs per in unic concert sajan remartgabels.

Gronda dischillusiun

Il directur dal Festival da Jazz San Murezzan, Christian Jott Jenny, n’ha nagina chapientscha per la decisiun da l’Uffizi da cultura. Il cumponist e musicist da renum internaziunal Ludovico Einaudi s’haja laschà engaschar per il concert en emprima lingia pervi da la cuntrada unica. Senza ils 50'000 francs dumandads dal chantun saja il concert periclità ha ditg Jott Jenny envers RTR.

Nagina posiziun da Jäger

Il cusseglier guvernativ, Martin Jäger na vul actualmain betg pigliar posiziun. La regenza haja survegnì la dumonda da reponderaziun. Avant che quella na saja betg tractada, na possia ella dir nagut.

Sustegn da 3 vischnancas

Per Christian Jott Jenny è la situaziun anc pli speziala cun quai che tut las trais vischnancas purtadras dal concert, Puntraschigna, Schlarigna e San Murezzan, sustegnan il project che custa en tut 350’000 francs. Il concert open air Lej da Staz è bain part dal Festival da Jazz San Murezzan, ha dentant in agen budget. Ils ultims onns è quel concert mintgamai stà organisà a Muottas Muragl.

Per l'entir Festival da Jazz San Murezzan ha il chantun gia decidì in sustegn da 160'000 francs ord il fondo da lottaria. Il Festival da Jazz ha in budget da radund 2 milliuns francs.

RR novitads 17:00