Siglir tar il cuntegn

Header

audio
Porta Samedan – Influenza sin il center da vischnanca
Or da Actualitad dals 20.09.2021.
laschar ir. Durada: 02:27 minutas.
cuntegn

Center da butias a Samedan Smaladicziun u benedicziun?

Dapi dus mais e mez è il center da cumpra «Porta Samedan» avert. In grond center cun diversas butias, restaurants ed in grond parcadi. Ils responsabels èn cuntents, il center attiria blera glieud, uschia Urs Pfister, il patrun da construcziun.

En il center da la vischnanca è la situaziun però autra. Cun spassegiar tras la vischnanca da Samedan croda numnadamain svelt si ch’i na gira betg bler. Ins inscuntra be paucas persunas, plirs locals da butias en vids. Quai constateschan er las Samedrinas ed ils Samedrins. La culpa na saja però betg il nov center da cumpra. Tenor els saja quai in process che capita gia dapi plirs onns.

La culpa è mintg’indigen sez. Tar ils affarists indigens van blers be a pruvar en la rauba e cumprà vegn suenter sur l’internet perquai ch’igl è pli bunmartgà.
Autur: Moreno Tuena abitant da Samedan

Il center da butias plascha numnadamain a las indigenas ed ils indigens. Per els èsi però impurtant ch'i vegnia tschertgà soluziuns per ch'i dettia er puspè vita en la vischnanca.

Differentas purschidas sut in tetg

Differents motivs datti per vegnir a visitar il nov center da cumpras a Samedan. Natiralmain è il «Migros» insatge nov per l'Engiadina, ma era causa d'auters motivs vegnan abitantas ed abitants da damanaivel e lontan a visitar il nov lieu central a Samedan.

La maioritad dals visitaders vesan la simpla pussaivladad da parcar sco grond avantatg, auters chattan qua butias che n’existan betg pli en lur vischnanca e singuls van a la tschertga da contact. Qua ins chattia ed inscuntra ina massa glieud per ir a baiver in café.

Porta Samedan
Legenda: Porta Samedan Il center da cumpras «Porta Samedan» RTR, Georg Luzzi
audio
Porta Samedan: L'avertura e las emprimas experientschas
02:47 min, Sport ed actualitad dals 19.09.2021.
laschar ir. Durada: 02:47 minutas.

Il start è reussì

Il manader dal center Urs Pfister è fitg cuntent cun la situaziun. El bada in grond interess da la populaziun. Criticas haja segir dà, ma betg gravantas. Il concept ha funcziunà, tenor Pfister, unic las tavlas d’indicaziun dals parcadis han ins stuì curreger.

A partir da subit è avert era il segund object gist dasper il center da butias. Là sa chattian lieus da lavar autos, in center da fitness e nov era il post da polizia.

RTR actualitad 17:00

Artitgels legids il pli savens

Scrollar a sanestra Scrollar a dretga