Siglir tar il cuntegn

Engiadina Cartel en Engiadina: Co pon ils pertutgads sa proteger

Ils ultims dis è vegnì rapportà bler davart il cartel da firmas da construcziuns en l'Engiadina. Tge far sco pertutgà?

Legende: Video Scandal da cartel: Co pon ils pertutgads sa dustar? abspielen. Laufzeit 03:56 Minuten.
Or da Telesguard dals 01.05.2018.

Era persunas privatas pudessan esser vegnidas cugliunadas dal cartel en l'Engiadina. Pussaivladads da sa dustar datti, simpel n'è quai dentant betg. Stefan Metzger, advocat spezialisà per dretg da bajegiar e d'immobiglias, è cleramain da l'avis ch'ils pertutgads hajan dretg sin indemnisaziun per ils donns eventuals. Il rapport da la WEKO che vegn publitgà proximamain vegnia ad esser in grond agid per ils privats.

Sche la cunvegna da pretsch per in object privat è cumprovada da la WEKO èsi bain pussibel d'avair bunas schanzas cun quests mussaments. Uschiglio vegni dentant grev. La supposiziun na tanscha betg. Pussibel è dentant er da chattar in infurmant.
Autur: Stefan Metzgeradvocat spezialist AAS dretg da construcziun ed immobiglias

Be per ir davant dretgira èsi da pajar radund 10% da la summa dal bajetg. Quai èn svelt ina giada 50'000 francs e dapli. Perquai dubita l'expert Stefan Metzger che blers privats fan il pass davant dretgira. Quels stuessan numnadamain pigliar en cumpra gronds custs per advocats gia avant ch'il cas vegn insumma davant dretgira. Plinavant portan els il ristg dad era anc stuair surpigliar ils custs dals involvids, sche quels gudognan davant dretgira. Quai è ina gronda barriera per daventar activ.

Kurt Baumgartner, in hotelier da Scuol, ha perquai tschertgà ina schliaziun individuala. Durant in café vul el empruvar da discutar persunalmain cun l'interprendider davart ses cas. Stefan Metzger dubita, schebain quai remplazza in advocat char. Sbagls giuridics pon capitar uschia pli spert ed uschia custar al client dapli daners.

Avair raschun e survegnir dretg èn duas differentas chaussas.
Autur: Stefan Metzgeradvocat spezialist AAS dretg da construcziun ed immobiglias

Er sch'ins survegniss dretg, n'èsi betg cler sche l'interpresa vegniss da pajar il donn u sch'ella avess da declerar concurs.

RR Telesguard 17:40