Siglir tar il cuntegn
Inhalt

Engiadina Campiunadi mundial da skis 2017 er sin pistas da Zuoz

La Costa da Pizzet sur Zuoz è il lieu per quatter cursas da qualificaziun per las uschenumnadas «pitschnas naziuns». Per garantir ina bun’organisaziun, tschertgan ils da Zuoz voluntaris.

Skiunz.
Legenda: Era sin il territori da skis a Zuoz datti cursas da skis durant il campiunadi mundial 2017. MAD

Las quatter cursas da qualificaziun, mintgamai per umens e dunnas, èn en las disciplinas da slalom e slalom gigant. Ils atlets da las naziuns main enconuschentas, han l’emprim da sa qualifitgar per las grondas cursas al campiunadi mundial da skis 2017 a San Murezzan.

Plaschair cumbinà cun gronda sfida

Ils organisaturs locals da las cursas a Zuoz sa legran da pudair beneventar ils radund 120 atlets cun tut lur entourage en la regiun da skis tranter ils 11 ed ils 18 da favrer 2017. Dentant munta l’organisaziun da las cursas er ina gronda sfida. Surtut cun quai ch’il campiunadi mundial da skis ha lieu er anc durant il temp il pli intensiv areguard ils giasts che passentan lur vacanzas da sport en Engiadina.

Tschertgar ulteriurs voluntaris

Sper il sustegn che Zuoz vegn a survegnir da San Murezzan areguard material ed era gidanters, tschertgan il 'Club da skiunzs' Zuoz e la societad che promova ils implants da skis a Zuoz anc voluntaris ch’èn sche pussaivel disponibels durant tut l’emna da las cursas sin la costa da Pizzet.

RR actualitad 12:00