Siglir tar il cuntegn

Engiadina Bun’entschatta per pestgar sin glatsch

L’ultima fin d’emna ha cumenzà il segund ed il ultim onn da pilot per pestgar sin glatsch en il Lai da Segl. Suenter ils emprims trais dis han ins pestgà en tut 16 peschs, da quels 13 Namaycushs.

Quatter pestgaders da pestga sin glatsch sin il lai da Segl.
Legenda: Sche questa pestga daventa ina pestga uffiziala n'è per il mument anc betg cler. Societad da pestgaders Lej da Segl

60 pestgadras e pestgaders han la fin d’emna passada empruvà lur fortuna sin il Lai da Segl. Suenter ils emprims trais dis dad en tut nov fin d’emnas èn vegnids pestgads 16 peschs, tranter quels 13 Namaycushs. In bun cumenzament tenor la societad da pestgaders Lej da Segl. La finamira è numnadamain da reducir la populaziun dal Namaycush, che concurrenzescha e maglia ils peschs indigens.

Era l’Uffizi da chatscha e pestga dal Grischun tira ina bilantscha intermediara positiva. Surtut en cumparegliaziun cun l’onn passà. Radund 100 peschs vulevan ins pestgar quella giada. Bandunà l'aua avevan però mo 35 peschs. E mo la mesadad da quels era Namaycushs. Uschia che la finamira principala dal project, n’era betg vegnida ademplida.

Sche questa pestga daventa dentant ina pestga uffiziala sajan ins alura pir dir suenter la finiziun dal segund onn da pilot.

Infurmaziun als pestgaders

Pervia da la blera naiv recumonda la societad da pestga Lej da Segl da duvrar gianellas sin il lai. Plinavant fan ins era attent sin il privel da rumper en en vischinanza dals auals.