Brocki Girella vi da las ultimas preparativas

Suenter che l’armada dal salit (Heilsarmee) aveva bandunà la Brocki a Schlarigna, ha l’uniun Girella sa decidida da manar vinavant quella. Quai surtut per avair in’occupaziun per ils abitants da la Girella a Bever. Uss è la Brocki pronta.

brocki

Legenda da maletgs: L'uniun Girella ha surpiglià da l'armada dal salit la brocki RTR, A.Caprez

Suenter che l’uniun Girella aveva surpiglià il 1. d’avrigl las localitads en la zona industriala da Schlarigna, han ins nettegià e renovà la Brocki. Quai cun agid dals commembers da la suprastanza da l’uniun Girella e da plirs voluntaris. Da l’anteriur possessur che manava la Brocki a Schlarigna hajan ins be surpiglià pauca rauba, ha declerà la manadra da l’uniun Girella, Ursi Costa.

«  Nus vain gia pudì ir en differents lieus per mobiglia e rauba ch’ins venda facilmain. »

Ursi Costa
manadra uniun Girella Bever

Stgazis da segunda maun sin 300 m2

Tut la rauba che la glieud vul manar en la Brocki, na piglian els dentant encunter, ha suttastritgà il falegnam en chasa, Christoph Schäfli. Savens riva mobiglia e rauba tar la Brocki cura ch’ina chasa vegn sgumbrada. Tranter quella chatt ins adina puspè era stgazis. En tut èn actualmain passa 1000 differents tocs en vendita en las localitads da la Brocki a Schlarigna. Cumenzà tar ina furtgetta d’argient, sur in mulin da café, fin tar entirs mobigliaments per ina stiva.

Occupaziun è fitg importanta

Cun manar vinavant la Brocki a Schlarigna, vul ins gista accumplir duas finamiras. Dad ina vart duai la purschida d’in lieu, nua ch’ins po cumprar rauba pèr in pretsch favuraivel restar, da l’autra duai la Brocki era porscher plazzas da lavur per persunas, che vulan turnar suenter ina crisa puspè en il martgà da lavur, scriva l’uniun Girella en sia communicaziun.

L’avertura da la Brocki Girella ha lieu la sonda, 4 da zercladur 2016 da las 11-16 h.