Dapi la crudada da grippa dals 23 da december 2023, vegnan las lavurs da segirezza e da rumida fatgas cun tutta forza. L'Uffizi da construcziun bassa dal Grischun saja optimistic, ch'el po la fin da schaner puspè dar liber la via d'Engiadina tranter Vinadi ed il cunfin, quai sin in vial.
Vastas lavurs da sanaziun
Gia la fin da l'onn 2023 han ins cumenzà a rumir il material dal grip per allontanar la crappa lucca en la zona da distatga. En il fratemp han ins terminà questas lavurs. Actualmain vegn il material da grip ch'è crudà sin la via veglia da Samignun rumì cun maschinas.
Las proximas emnas ston vegnir fatgas ulteriuras lavurs da segirezza en il territori da la crudada da grippa: Fin la fin da l'emprima emna da schaner vegn construì in rempar da protecziun en il sectur dal material crudà. Suenter po il terren fitg taiss vegnir splattà giu da surengiu. Plinavant vegnan sguladas natiers pliras retegnidas da bostgs ed installadas en il territori da la crudada da grippa. Tut il material luc vegn – tant sco pussaivel – allontanà. Supplementarmain vegnan montadas duas retschas da palissadas d'atschal sur la via d'Engiadina. Pir suenter avair terminà questas lavurs da segirezza sin la spunda, po l'Uffizi da construcziun bassa cumenzar a rumir sco er a reparar per part ils vials ed ils mirs.
Vial provisoric per il traffic, be sche l'aura fa cun
Per il traffic vegn construì in vial provisoric ed i vegn installada in'ampla da traffic. Igl è da far quint che la via d’Engiadina possia esser libra la fin da schaner per il traffic, e quai sin in vial.
Quai dentant be, sche l’aura fa cun e las lavurs da construcziun giajan tenor plan. Las temperaturas na dastgan betg arrivar sur il punct da schelira ed i na dat betg bler plievgia u naiv. Las ulteriuras lavurs per reparar la via d'Engiadina e per allontanar definitivamain il material crudà han lieu suenter che la naiv è luada, a partir da la primavaira 2024, en in manaschi cuntinuant.
Quai è capità
Ina platta da radund 20'000 meters cubics è vegnida libra la sonda, ils 23 da december 2023. La blera plievgia e las temperaturas bassas silsuenter hajan chaschunà quai. La platta immensa è ida en tocca ed il material ha cuntanschì la via chantunala e finalmain l'En, il flum che passa giu al funs da la val. Sin quai èn spezialists e guidas da muntogna stads vidlonder da pulir giu la paraid.
La via è vegnida sutterrada tranter la Val Spelunca e Vestmezza. In sviament via Nauders e Pfunds è signalisà. Il sviament maina sur la via da Martina a Danuder e vinavant sur la via da Reschen a Fuond.
