Uschè eran per exempel dal 2010 libras set abitaziuns a San Murezzan. Dal 2016 èn quai 74. U Zuoz cun 0 libras il 2010 ed oz 34 abitaziuns vidas.
L’offerta è pli auta che la dumonda. Ils davos onns è vegnì bajegià memia bler. In auter motiv per la situaziun è era, che fin avant in pèr onns vegnivan abitaziuns per indigens fittadas a giasts. Oz mancan quels, surtut ils Talians en Engiadin’Ota. Las abitaziuns èn vidas.
Anc adina pretschs memia auts
Tiers vegn ch'ils pretschs per in’abitaziun en Engiadin’Ota èn per part anc adina memia auts, era pli auts che quels dal martgà. Tenor Andry Niggli da la firma d’immobiglias Niggli&Zala SA haja quai in motiv simpel: Ils locaturs pon anc sa prestar da laschar vidas las abitaziuns, enstagl dad ir giu cun il fit. Quai savess dentant mintgin sa lubir di Niggli. Ins haja fatg avunda reservas ils davos onns.
Tenor el na dastga in’abitaziun da trais stanzas e mez betg custar dapli che 1’800 francs, forsa 1’900 francs, inclus tut. La Niggli&Zala SA surpigliess mo mandats nua ch’ils pretschs sajan adequats, tut il rest na vegnan era els betg da fittar - oz che l’offerta è per tant pli gronda che la dumonda.