Siglir tar il cuntegn

Header

video
Grondas discussiuns pervia dal num «Biosfera»
Or da Telesguard dals 14.09.2017.
laschar ir. Durada: 3 minutas 3 Secundas.
cuntegn

Engiadina Biosfera Val Müstair - votaziun davart nov num

Anc quest onn duai la populaziun da la Val Müstair votar sch'il parc da natira regiunal duai survegnir in nov num. Quai ha ditg il president communal durant ina saira d'infurmaziun.

glieud en ina sala
Legenda: La radunanza communala en Val Müstair. RTR, David Spinnler

La suprastanza communala da la Val Müstair propona da midar il num dal parc da natira regiunal da «Biosfera Val Müstair» en «Parc da natüra Val Müstair». Uschia fiss il parc quai ch'el è, numnadamain in parc da natira. Il num Biosfera fetschia ina faussa allusiun: il parc da natira na saja betg ina biosfera. La suprastanza communala argumentescha che cun il num «Parc da natüra Val Müstair» saja era pussaivel d'evitar scumbigls tranter il parc da natira - la Val Müstair - ed il Reservat da biosfera Engiadina Val Müstair. Quel ha il label da l'Unesco e consista da la Val Müstair, da Scuol e dal Parc Naziunal.

Valur emoziunala

audio
Saira: Co duai il parc da natira en Val Müstair avair num?
ord Actualitad dals 14.09.2017.
laschar ir. Durada: 3 minutas 19 Secundas.

Ils adversaris, surtut da l'Uniun da mansteranza e gastro Val Müstair, din percunter ch'ins na possia betg simplamain bittar davent in num che saja sa cumprovà durant pli che diesch onns. Il num Biosfera per il parc da natira saja in element che fetschia ina differenza tranter la Val Müstair e tut ils auters parcs da natira en Svizra.

La fin finala hai anc dà ina proposta da cumpromiss: da numnar il parc da natira «Parc da natüra Biosfera Val Müstair». La suprastanza communala vul ussa anc ina giada discutar variantas pussaivlas. Lura vul ins dentant anc decider quest onn la midada dal num, a chaschun d'ina radunanza communala.

RR novitads 06:00

Artitgels legids il pli savens