Ils ultims onns è s’augmentada la dumonda da la biera da Tschlin uschè ferm, ch’i na saja betg pli pussaivel da producir en l’avegnir avunda biera en las localitads actualas, quai tenor Reto Rauch, il mainagestiun da la Bieraria Tschlin SA.
Ina pussaivla soluziun fiss che la vischnanca da Valsot cumprass la chasa da las Ovras Electricas d’Engiadina a Martina per radund 630’000 francs e la Bieraria Tschlin prendess a fit quellas localitads.
Questa soluziun vess dad ina vart il grond avantatg che las localitads fissan grondas avunda per producir era en l’avegnir la quantitad da biera giavischada. Da l’autra vart fiss uschia era schlià il problem d’access, perquai che la chasa a Martina sa chatta gist sper la via chantunala.
Suveran decida ils 28 d'avust
Glindesdi, ils 24 d’avust, datti a Tschlin ina infurmaziun ed ils 28 d'avust ha il suveran da Valsot lura da decider areguard quest credit. Sch’il suveran da Valsot acceptass la dumonda da credit fiss la midada prevesida anc quest onn.
RR novitads 17.00