Il plan da Felix Keller è da producir durant la bunatscha puspè naiv cun l'aua da naiv. Quai duai possibiltar in nov sistem dad ennavar che na dovra nagina energia electrica e che producescha naiv autonomamain: La lantscha inventada da la firma svizra Bächler Top Track SA producescha naiv mo cun il squitsch da l'aua.
Cun ina tala lantscha vul Felix Keller producir sper la chamona Lischana durant ils mais avrigl ni matg in mantun da naiv da var 30 meters autezza. Il mantun da naiv è il reservuar che duai lura furnir davent da l'avust l'aua a la chamona.
Sistem da lantscha vegn testà al Morteratsch
Durant quest enviern testa Felix Keller la lantscha dasper la staziun Morteratsch. Quai a l'ur dal vitget da las stupas da glatsch che duain sensibilisar per il tema da la mancanza da naiv.
Il project tar la chamona Lischana avess damai la medema incumbensa sco las stupas da glatsch en il Himalaya nua ch'ella èn vegnidas inventadas: da servir durant la primavaira e la stad sco reservuars d'aua.
RR actualitad 07:10