La halla da glatsch duai porscher plazza per var 400 persunas. Plinavant duai dar gardarobas e lieus per trenar la forza e per far gimnastica. Surtut las uniuns localas da hockey, dentant er classas da scola duain pudair nizzegiar l'infrastructura. Quai ha communitgà la vischnanca da San Murezzan. Er ina utilisaziun publica duai esser pussibla, e sche las reservaziuns lubeschan er in diever turistic. Sin l'areal duai plinavant dar ina plazza da parcar cun 160 plazzas.
La suprastanza ed il cussegl da vischnanca avevan gia en il plan per la legislatura actuala decis da realisar ina halla da glatsch. La concurrenza da project è vegnida scritta or avant curt. Ella va fin l'atun 2024.
Renovaziun avant construcziun
Avant ch'i po vegnir construì sin l'areal, sto il terren enturn la deponia veglia vegnir sanà. Davart il credit per quai duai la populaziun vuschar la primavaira 2025. Sche tut va tenor plan, duess l'onn 2026 vegnir cumenzà a construir. La halla da glatscha duai ir en funcziun la fin dal 2028.
Ensemen cun la halla da glatsch, collia la vischnanca er anc ulteriurs projects. L'arena da glatsch existenta Ludains duai vegnir stgarpada giu. L'areal tar la riva dal lai duai sinaquai vegnir transfurmà. Plinavant duai er la halla da recicladi sper la staziun vegnir stgarpada giu. Sin il spazi liber planisescha la Viafier retica abitaziuns per indigens. Dapli infurmaziuns duai dar il fanadur.
Or da l'archiv