Engiadina - Anè da Vico Torriani sco portafortuna per actur dal musical
Durant ina da las ultimas provas per il musical “Hotel Victoria” che vegn represchentà a San Murezzan proxim’emna, ha la figlia da Vico Torriani, Nicole Kündig-Torriani, surdà in rintg tut spezial ad in dals dus umens che giogan la rolla dal chantadur ed entertainer en il musical.
Da la premiera dal musical «Hotel Victoria» dals 24 da favrer a San Murezzan (20:00) fa Radiotelevisiun Svizra Rumantscha in livestream. Quest pudais guardar cumadaivel a chasa:
L’anè duai purtar cletg a l’actur Samuel Zünd, sco quai ch’el haja purtà fortuna a ses bab durant decennis, ha declerà Nicole Kündig-Torriani tut commovida suenter avair vis l’emprima giada parts dal musical.
Figlia intgantada da musical
La sumeglientscha da la figura Vico Torriani cun ses bab barmier saja simplamain frappanta. Surtut il moviment, ils gests e la mimica sveglian bellas regurdientschas in ella.
Nus tuts quatter avain uschè in rintg cun la vopna dals Torrianis
Sper l’anè cun la vopna da famiglia, purtava Vico Torriani durant sia lavur sin tribuna e davant la camera er adina ina culauna enturn culiez sco amulet cun ils nums da la dunna Evelyne ed ils dus uffants Nicole e Reto.
audio
Musical Hotel Victoria a San Murezzan
04:34 min, ord Novitads dals 19.02.2016.
laschar ir. Durada: 4 minutas 34 Secundas.
audio
Saira: Hotel Victoria - Best of dal di da Vico Torriani