Siglir tar il cuntegn
cuntegn

Engiadina Andri Marugg a la «Diagonela»

Per la quarta giada cumbattan radund 800 passlunghists sin il traject scursanì da «La Diagonela» per puncts e temp. Cunquai che las temperaturas annunziadas per il di da cursa van sut -20 grads vala en emprima lingia da proteger l’atgna sanadad.

Per betg respirar direct l’aria fraida durant ils 50 km da la cursa porta Andri Marugg, che viva en Engiadina ed è disà las temperaturas fraidas, ina protecziun.

protecziun bucca
Legenda: La protecziun encunter aria fraida sumeglia in tec ad in orgelet da bucca. mad

L'aria circulescha uschia avant che arrivar en bucca tras in filter, quel duai stgaudar l'aria ed uschia proteger ils pulmuns dal sportist.

Cunquai che sia bucca resta adina averta tras la protecziun speziala, perda el er dapli energia e l'impurtant liquid. Perquai ha il pur da Zuoz organisà sper ils posts da la cursa anc ulteriurs lung il traject. Uschia possia el segir er baiver avunda.

Buna preparaziun da stad cun Curdin Perl

L’um sportiv da 35 onns sa participescha quest onn per la terza giada a «La Diagonela». Durant ils mais da stad haja el gì l'occasiun da sa preparar per l’enviern ensemen cun Curdin Perl. La finamira dad Andri Marugg è perquai da rivar quest onn sut ils emprims 50 curridurs.

La cursa en il stil classic ha lieu per la quarta giada en l’Engiadina. Causa la situaziun da naiv er quest onn sin in traject pli curt.