Siglir tar il cuntegn

Engiadina Anc nagin cumpromiss en chaussa Bogn da cura San Murezzan

La possessura dal center medicinal, la Bäder SA, fiss pronta da prolungar il contract cun il Bogn da cura cun cundiziuns. Il Bogn da cura n'ha dentant anc betg acceptà ina soluziun cuminaivla. Quai ha ditg il CEO da la Bäder SA, Raimund Kirchleitner.

bogn da cura
Legenda: La Bäder AG avess plans per renovar ed adattar il center medicinal als basegns dad oz A.Engel

Suenter ch’il Bogn da cura aveva annunzià da vulair ir la via giuridica per evitar la desditga, propona la Bäder SA uss in cumpromiss al Bogn da cura. Co che quel duai vesair ora ha preschentà Raimund Kirchleitner a la seduta dal cussegl communal a San Murezzan: Il Bogn da cura pudess restar en il center medicinal, dentant sin ina surfatscha pli pitschna che enfin ussa.

Bogn da cura vul tractar la proposta

Sco quai che Raimund Kirchleitner ha declerà al cussegl communal da San Murezzan haja la Bäder SA survegnì signals per part positivs dal Bogn da cura. Il cussegl administrativ haja empermess ina resposta sin la proposta da la Bäder SA suenter la sesida dal cussegl administrativ da Bogn da cura dals 6 settember.

Enfin lura na vul il Bogn da cura betg prender posiziun en las medias. Quai ha ditg Britta Ahlden da la direcziun dal Bogn da cura envers Radiotelevisiun Svizra Rumantscha.

Tenor Raimund Kirchleitner sto l'entir cas esser reglà fin la fin d'october. Quai pervia dal cas da locatari ch'è pendent davant il tribunal.

Il conflict bogn da cura

Dapi il 2002 vegn manà il bogn da cura dal center da terapia medicinal MTZ. 2017 duai sa midar quai, di la possessura dal bogn, la Bäder AG. Il concept dal MTZ saja antiquà. Perquai ha la Bäder AG desditg al MTZ il contract da locaziun. Il MTZ vul restar e sa dosta giuridicamain: Stuair bandunar il bogn da cura signifitgass da dar si il manaschi.