Siglir tar il cuntegn
Inhalt

Engiadina Albiert Meierei a San Murezzan serra per immediat

L’hotel sper il Lai da San Murezzan ha serrà sias portas. Il motiv saja la gronda perdita che l’interpresa ha fatg, ha confermà l’advocat Andrea-Franco Stöhr. L’edifizi duai tuttina vegnir bajegià enturn vinavant.

L'hotel Meierei da surengiu sper il Lai da San Murezzan.
Legenda: L'hotel Meierei giascha sper il Lai da San Murezzan. Keystone

L’albiert Meierei duai vegnir restructurà e manà vinavant sco hotel-restaurant modern e quai a lunga vista. Per il temp da svilup dal project avev’ins puspè avert il manaschi. Suenter dus onns na saja quai dentant betg gartegià da manar quel a moda rentabla, uschia l’advocat Andrea-Franco Stöhr. El na sappia dentant er betg dir pertge che l’affar haja scrit cifras cotschnas.

Ils possessurs èn da buna speranza

Ils possessurs da l’hotel sajan vinavant persvadids che la «Meierei» haja in avegnir. Ch’els vegnian er ad ademplir tut ils impegns ed obligaziuns ord il manaschi actual. Quant aut che l’import è, haja el pir dad eruir, ha declerà l’advocat. Ins veglia dentant lavurar vinavant vi dal project da l’albiert a la riva dal Lai da San Murezzan. Previs è ch’il project vegn preschentà anc quest onn a vischins ed uffizis per inoltrar finalmain ina dumonda da bajegiar.

RR novitads 17:00