Siglir tar il cuntegn
Inhalt

Engiadina «Al Flaz»: Relevant per il sistem u sustegn tranter collegas?

La regenza Grischuna sustegna il project «Al Flaz» a Puntraschigna cun in milliun francs. Quel intent chaschuna critica – critica da politichers indigens.

Legende: Video Ina decisiun critica abspielen. Laufzeit 01:55 Minuten.
Or da Actualitad video dals 07.07.2017.

La regenza Grischuna ha communitgà la fin da zercladur, ch’ella vul sustegnair il project «Al Flaz» planisà a Puntraschigna cun in milliun francs. I sa tracta dad in hotel da trais stailas cun 188 letgs e quatter plauns, che stat en connex cun l'implant da sport e vegniss renovà da la vischnanca da Puntraschigna per 3,5 milliuns francs.

Il hotel «Al Flaz» correspunda als criteris ch'i dovra per esser relevant per il sistem.
Autur: Jon Domenic Parolinicusseglier guvernativ

L'argumentaziun da Jon Domenic Parolini, schef dal departament d’economia e fatgs socials, è che la cundiziun «relevant per il sistem» saja accumplida tar il hotel. Il project stoppia d'ina vart esser cumbinà cun in'ulteriura investiziun. Tar «Al Flaz» saja quai il cas cun l'implant da sport per 3 milliuns francs che vegn finanzià da la vischnanca. Da l'autra vart stoppia il project avair ina tscherta grondezza cun 100 letgs novs. Plinavnat dovria in consens da la regiun ch'il project correspundia ad in basegn pli grond. Quest consens da la regiun hajan era ils presidents communals da l'Engiadin'Ota confermà a scrit.

Relevant per il sistem u sustegn tranter collegas?

Politichers indigens crititgeschan uss quai sustegn dad in milliun francs. Els sa dumondan pertge che Puntraschigna vess da survegnir quai sustegn finanzial – Puntraschigna, che haja ina hotellaria che funcziunescha bain – ed ultra da quai na fetschia in sustegn mo per in project nagin senn.

En la publicitad vegn plinavant crititgà, ch'il project da Puntraschigna vegni mo sustegnì perquai ch'il regent Parolini saja in collega dad ina part dals investiders dal project – la famiglia Baumgartner da Scuol.

Parolini neghescha la rinfatscha

Regent Jon Domenic Parolini ed anteriur president communal da Scuol neghescha quella renfatscha. Il project «Al Flaz» da Puntraschigna saja stà l'emprim hotel, ch'haja inoltrà la dumonda ed accumpleschia ultra da quai er tut las pretaisas necessarias per survegnir il sustegn finanzial. Tenor Jon Domenic Parolini datti gia proximas dumondas ch'il chantun examinescha ed el è persvadì ch'il chantun stoppia s'engaschar per la hotellaria.

RR actualitad 17:20