Siglir tar il cuntegn

Header

Navigaziun

Legenda: Guardar il video Zuoz vul midar constituziun per facilitar candidaturas. Durada 01:59 minutas.
Or da Telesguard dals 16.02.2015.
cuntegn

Engiadina Adina pli difficil da chattar candidats per uffizis communals

A Zuoz vul ins midar la constituziun communala per augmentar las schanzas da chattar er ils proxims onns anc persunas che surpiglian in uffizi communal. Oravant tut la data d'entrada en uffizi duai vegnir midada da mars sin fanadur. Ed il pensum dil president duai daventar variabel.

Per facilitar la tschertga da novs candidats per ils uffizis da la vischnanca da Zuoz, duai quella midar il punct da partenza da la nova carica sin ils 1. da fanadur enstagl sco fin oz be in di suenter las elecziuns da Chalandamarz, ils 2 da mars. Cun quella midada pudess er candidar ina persuna per in uffizi che na riva betg da surpigliar quel gist in di suenter sia elecziun.

Midada da lescha sto vegnir approvada

Per quest midament a reguard il temp d’uffizi, ha il suveran da Zuoz d’approvar ina midada da la constituziun communala. Il cussegl communal vul tractar la fatschenta en ina da las proximas radunanzas.

Unic candidat per il post da presidi

A Zuoz vegnan tut las autoritads elegidas tradiziunalmain ils 1. da mars. Il president communal actual da Zuoz, Flurin Wieser, sa metta quest onn a disposiziun anc ina giada per in’ulteriura perioda da trais onns. El va sco unic candidat en cursa per il presidi. Per il cussegl communal vuli duas confermas per dus cussegliers en uffizi.