700 chantaduras e chantadurs da cumpagnia a Poschiavo

La festa da chant districtuala da l’Engiadina, la Val Müstair, la Bergiaglia ed il Puschlav ha attratg a 28 differents coros en la val taliana.

Sper la concurrenza da chantar davant ina giuria è la cumpagnia per la gronda part dals participants stada il pli impurtant da la festa da chant districtuala. Uschia han ins era udì or da tut las ustarias pussaivlas chant ed allegria.

Nagins sponsurs principals

Per il Coro misto poschiavino che ha organisà l’inscunter suenter passa 50 onns puspè ina giada en la Val Puschlav è surtut la finanziaziun da la festa stada ina sfida.

Enstagl da paucs sponsurs principals, figureschan radund 70 donaturs pli pitschens en il program da festa. Cun organisar ina festa da chant sur dus dis hajan ins dentant pudì generar pernottaziuns en val, ha declerà il president dal comité d’organisaziun, Claudio Paganini.

Tensiun e concentraziun

Laschar ir video «Chor da 100 umens Parc Naziunal Svizzer»

Chor da 100 umens Parc Naziunal Svizzer

1:03 min, Actualitad video dals 5.6.2016

Silenzi ed ina concentraziun maximala han ins pudì observar durant il chant en las dus baselgias a Poschiavo, nua ch’ils coros han sa preschentads a la giuria mintgamai cun trais chanzuns. Suenter avair chantà èn la tensiun e l’agitaziun dentant puspè sa baltgadas, uschia ch’ils chantadurs han pudì giudair l’atmosfera e chantar da cor en cumpagnia.

In dils puncts culminants da la festa da chant è er il chant dal cor dal parc naziunal svizzer la dumengia, nua che bun 120 umens chantan ensemen sin la Piazza da Poschiavo.

RR actualitad 21:00+

Emissiun tar quest artitgel