Il territori da skis Minschuns è vegnì inaugurà l'onn 1976. Ussa pon ins festivar il 40avel giubileum. L'enviern da giubileum è fin ussa stà difficil pervia da la pauca naiv. Envierns cun difficultads, quai hai adina puspè dà en il territori pitschen. Minschuns n'ha betg grondas capacitads per ennavar.
Uschia ha ditg il president dal cussegl administrativ Vito Stupan en ses pled da giubileum ch'i saja impurtant da realisar ils projects per l'avegnir: in sistem cumplessiv per ennavar, in vitg da vacanzas a Tschierv ed ina sutgera da Tschierv sin la muntogna.
la fin d'emna dals 23 e 24 da schaner è la gronda festa da giubileum cun diversas attracziuns e cun la pussaivladad per in e mintgin dad ir gratuitamain cun skis a Minschuns.
Avegnir cun energias alternativas?
In dals fundaturs da Minschuns, Oswald Toutsch ha ditg a la festa da giubileum che el saja persvadì dal futur da Minschuns. E che el speria che las generaziuns che lavuran ussa vid novs projects chattian bunas soluziuns per Minschuns. Per exempel cun energias alternativas. Quai fiss tenor Toutsch era ina buna soluziuns per Minschuns sco part da la Biosfera Val Müstair.