Siglir tar il cuntegn
cuntegn

Engiadina 30 onns suenter: Las malauras en la Valposchiavo

Fastizs dals donns chaschunads tras l’inundaziun dal 1987 na chatt'ins betg pli sin l’emprima egliada. L’infrastructura e las chasas èn refatgas, Poschiavo sa preschenta puspè sco sche nagut fiss mai capità. Las regurdientschas ed il respect da la natira èn dentant restadas.

Legenda: Guardar il video 30 onns suenter la catastrofa. Durada 01:24 minutas.
Or da Actualitad video dals 20.07.2017.

In’enorma quantitad dad aua, belma e crappa era rivada la notg dals 18 da fanadur 1987 entamez la vischnanca da Poschiavo ed aveva devastà ina gronda part dal vitg. La punt sur il flum Poschiavino era memia bassa per tragutter tut il material. Las massas èn perquai rivadas cun l’aua sur ils mirs ora.

Guido Lardi
Legenda: Guido Lardi era il coordinatur en vischnanca suenter la catastrofa dal 1987. RTR, Anna Caprez

Populaziun è restada calma

La pli grond’impressiun haja fatg a Guido Lardi, el era il coordinatur da tut las intervenziuns suenter las malauras a Poschiavo, ch’ils abitants eran restads tut calms, malgrà la catastrofa. El sez n’era betg en la val cura che las massas dad aua, crappa e belma èn rivadas cun fracass entamez la vischnanca da Poschiavo, la notg tranter ils 18 e 19 da fanadur 1987.

Mintgin sa regorda

Er il president communal da la vischnanca da Poschiavo, Alessandro Della Vedova, sa regorda anc bain da la catastrofa natirala en val. Da vesair la vischnanca sut in meter belma e merda haja fatg grond’impressiun quella giada al giuven da 17 onns.

Solidaritad svizra

En tut hajan ins notà a Poschiavo e conturns donns da radund 120 milliuns francs. Donns ch’ins ha pudì pajar grazia il grond sustegn da Chantun e Confederaziun, ma er grazia a la solidaritad da la populaziun svizra che ha contribuì 10 milliuns francs cun donaziuns.

Nagina «Santa Alluvione»

Cun quai che la vischnanca da Poschiavo ha pudì refar e renovar ina gronda part da l’infrastructura donnegiada tras las malauras dal 1987 grazia a donaziuns e pajaments da Chantun e Confederaziun, discurran ins adina puspè da la «Santa Alluvione» - l'inundaziun sontga.

Dentant n’è quai betg stà uschè, ha suttastritgà Guido Lardi. El era avant 30 onns il deputà e coordinatur per tut las intervenziuns ed acziuns suenter la catastrofa. Sco sontga poss ins be chapir l’inundaziun pervi ch’i n’ha dà nagins morts.

Morts en la Vuclina

Auter la situaziun en la Vuclina: Mo paucs dis pli tard avevan 53 persunas pers là lur vita. 50 milliuns meters cubic material eran vegnids giu da la muntogna ed avevan sepulì la vischnanca da Morignoe.

RR actualitad 17:20