Siglir tar il cuntegn
Inhalt

Engiadina 30 onns suenter la catastrofa nucleara da Tschernobyl

Ils 26 d’avrigl 1986 era il reactur en il bloc 4 da l’implant nuclear Tschernobyl explodì e radioactivitad è sa derasada sur lungas distanzas.

Luzi Oberer.
Legenda: Luzi Oberer (san.) en il champ d'uffants. MAD

La communicaziun n'è betg stada la meglra, la populaziun che viveva là en ils conturns è simplamain vegnida evacuada senza vegnir infurmada. Perquai ha era la glieud en Svizra gì tema.

Dapi quest uschenumnà « Super-Gau », s’engaschan numerusas organisaziuns e fundaziuns a favur da tut las victimas ed ils uffants che pateschan anc adina da la radioactivitad.

Uschia er Tschernobylkinder.ch, il link avra en ina nova fanestra, l’organisaziun che Luzi Oberer e ses frar Daniel han fundà avant 14 onns. Questa porscha mintg’onn in champ per uffants da Tschernobyl en la vischinanza da Sargans.

Durant trais emnas pon 34 uffants tranter 11 e 12 onns passentar lur vacanzas en il champ en Svizra.

Ramassar raps per projects en Ucraina

Sper quella purschida ramassa l’organisaziun anc adina raps per sustegnair e realisar novs projects sco scolas u plazzas da giugar en la regiun da Lugini en l’Ucraina. Luzi Oberer, ch'è l’ambassadur da l’organisaziun Tschernobylkinder.ch, va adina puspè a visitar e controllar las lavurs sin il lieu.

tualettas
Legenda: Ina nova scola grazia l'organisaziun - finalmain era cun tualettas L.Oberer

Per el èn la regiun e la glieud daventà ina segunda famiglia. Il conductur da la Viafier Retica ha entant er emprendì da discurrer russ, uschia ch’el è bun da communitgar bain cun las famiglias che vivan en la regiun enturn la zona contaminada.

Guardar enavant e betg enavos

Il di da «30 onns Tschernobyl» saja pli preschent per nus ch'en l’Ucraina sezza, di Luzi Oberer che sa chatta il mument en l’Ucraina. Las consequenzas sajan oz anc adina pli che gravantas. Di per di morian persunas en consequenza da la radioactivitad. Oz saja in di sco tut ils auters, di Luzi Oberer.