Siglir tar il cuntegn
cuntegn

Engiadina 30 onns Las Lodolas – «Che bels mumaints»

Cumenzà ha tut cun ina gruppa da magisters che stevan gugent ensemen per chantar suenter sesidas e radunanzas. Or da quella cumpagnia è sa furmà il chor «Las Lodolas» che dumbra oz 13 commembers.

Las Lodolas durant in concert da Nadal
Legenda: Las Lodolas durant in concert da Nadal dal 2002. mad

Oriundamain consistiva il chor dad otg commembers, dus per mintga vusch. Per avair adina avunda chantadurs, chantan oz 13 umens tar Las Lodolas sut la batgetta da Werner Steidle.

Engaschaments sur ils cunfins ora

Il chor da Las Lodolas è adina puspè engaschà tar occurrenzas e festas en Engiadina. Dentant ha il chor ch'è enconuschent per chanzuns en differentas linguas u er per gospels, chantà pliras giadas per la televisiun.

Quatter dad otg èn anc adina da la partida

Or dal plaschair da chantar e per promover la colleghialitad avev'ins fundà il chor sin cussegliaziun da Werner Steidle che dirigia fin al di dad oz la gruppa. Ils numerus arranschaments derivan dal dirigent passiunà. Quatter commembers ch’aveva fundà il chor Las Lodolas èn anc oz activs e da la partida.

Magica cifra 5

Entant ha la furmaziun gia chantà per passa 500 occurrenzas ed ha fin uss envidà a 5 concerts da giubileum. Per l'occasiun dal 30avel anniversari dattan Las Lodolas dus concerts da giubileum. Per l'occasiun da l'anniversari dal chor han Las Lodolas registrà durant in concert 22 chanzuns per in nov disc cumpact da giubileum.

Datas da concert da giubileum

  • sonda, ils 19 da november 2016 a las 20:00 en l’Hotel Laudinella San Murezzan
  • dumengia, ils 20 da november 2016 a las 17:00 en il Rondo a Puntraschigna
  • entrada libra – collecta