Siglir tar il cuntegn

Header

cuntegn

Engiadina 3 candidats per il presidi communal en Val Müstair

Gabriella Binkert-Becchetti, Rico Lamprecht e Josef Hohehenegger candideschan per la successiun dad Arno Lamprecht sco president communal.

audio
Ils trais canidats per il presidi communal en Val Müstair
ord Actualitad dals 07.09.2016.
laschar ir. Durada: 4 minutas 17 Secundas.

Gabriella Binkert-Becchetti da la Partida populara svizra PPS è actualmain vicepresidenta communala e lavura sco affarista. Rico Lamprecht da la Partida burgais democratica PBD è il deputà da la Val Müstair e lavura sco pur biologic. Josef Hohenegger è senza partida. El è falegnam pensiunà.

Ils candidats vulan s'engaschar en avegnir per la Val Müstair sco president u presidenta communala.

L'economia ed il turissem sco puncts centrals

Rico Lamprecht
Legenda: Rico Lamprecht da la PBD vul daventar nov president communal da la Val Müstair RTR, David Spinnler

Sin il sectur da l'economia èsi impurtant per Rico Lamprecht da realisar il project da svilup regiunal cun ina nova chascharia, in local per mazzar, elavurar charn ed in local per l'elavuraziun da graun. Uschia possia la Val Müstair generar plazzas da lavur per giuvens indigens ed exportar agens products.

Turisticamain vul Lamprecht promover in resort cun radund 400 letgs a Tschierv e renovar ils implants da skis da Minschuns.

Gabriella Binkert-Becchetti
Legenda: Gabriella Binkert-Becchetti candidescha sco commembra da la PPS RTR, David Spinnler

Gabriella Binkert-Becchetti vul promover l'economia cun sensibilisar la populaziun da betg ir a cumprar a l'ester. En pli vul ella s'engaschar per agids chantunals u federals per las vals dal sid che pateschan da l'euro flaivel.

Sco Rico Lamprecht vesa ella la pussaivladad d'in resort a Tschierv, dentant tenor ella stoppian era ils implants da skis da Minschuns vegnir renovads.

Gottfried Hohenegger
Legenda: Josef Hohenegger candidescha senza partida RTR, David Spinnler

Josef Hohenegger è da l'avis che la vischnanca stoppia en emprima lingia avair ina situaziun finanziala pli sauna.

Pertutgant il resort a Tschierv è el da l'avis che il ressort fiss bler memia grond. El prendess davent ils giasts als auters hotels, di Hohenegger.

L'emprim scrutini da l'elecziun dal nov president communal da la Val Müstair è ils 25 da settember.

Artitgels legids il pli savens