In lockdown fiss bler mender che questa mesira actuala, uschia il directur Claudio Duschletta. Il Bogn Engiadina Scuol fa quint cun damain frequenzas causa las mesiras. Per cletg datti però in center da test gist davant porta. La maioritad dals giasts han la encletga per la situaziun. A singuls ston ins declerar, quai è ina sfida oravant tut per il persunal.
2G+ per entrar en la bar
Las pendicularas Motta Naluns èn main pertutgadas da la mesira 2G+, quella han ellas introducì sulettamain per consumar en la Bar Marmotta. Per simplifitgar la situaziun pretendan els 2G+ dadens e dador la bar. Gist durant la stagiun auta saja impurtant dad avrir las portas.
En quest mument saja impurtant da resguardar l’aspect social e main quel economic, uschia il directur Andri Poo.
Ils giasts han l’encletga
RTR ha dumandà divers giasts che spetgavan davant il center da test. Quasi tuts han la pazienza da spetgar, per els èsi impurtant da pudair trair a niz las purschidas turisticas ed els èn perquai er pronts da far il test necessari per avair finalmain il 2G+.