Dapi ils 19 da november 1999 transporta la Viafier retica vehichels dal Partenz en l’Engiadina. Planisà è vegnì quella giada cun il transport da 400’000 vehichels l’onn. Las frequenzas èn però s'augmentadas mintg’onn, uschia che actualmain radund 500’000 vehichels l’onn passan tras il tunnel. Ma betg be la capacitad chaschuna grondas sfidas en l’avegnir, er l’infrastructura ha patì durant ils onns.
Sche jau discur dals proxims 10 onns, èsi bain pussaivel ch'i vegnan investids 100 fin 150 milliuns francs en il tunnel dal Vereina
Investiziuns en la segirezza e l’infrastructura
Tenor Christian Florin, il responsabel per l’infrastructura e vicedirectur da la Viafier retica è in dals gronds problems il sal ch'ils autos portan da las vias en il tunnel. Fertant ch'ils binaris tegnan normalmain var 40 onns, hajan ils binaris en il tunnel dal Vereina da vegnir renovads suenter 20 fin 25 onns.
Sper l’infrastructura duai vegnir investì ils proxims onns er en la segirezza. Sper novs vehichels da salvament duai il tunnel en avegnir vegnir ventilà activamain en cas da fim. Tenor Christian Florin èn er vegnids fabritgads e gia en funcziun dus uschenumnads portals termics che controllan ils vehichels che vegnan chargiads, che quels n'èn betg massa chauds.
Nova staziun a Sagliains
Er gia en funcziun è la nova staziun dals trens da persunas a Sagliains. La staziun è vegnida renovada e spustada pli vers ost, vers Lavin. Tras quest midament ed in ulteriur binari èn uss separads ils perruns dals trens da persunas e dal tren dal transport da vehichels. Tenor Simon Rohner, il responsabel dal transport da vehichels Vereina simplifitgescha quai er l’andament da chargiar ils autos ed ils camiuns.
Pretschs na vegnan betg augmentads
Quai che vegn a restar er en avegnir èn ils pretschs. Sulettamain il pretsch il pli aut che vala la fin d’emna durant la stagiun d’enviern vegn abolì. Uschia ch'i dat en avegnir mo pli ina tariffa unitara durant l’enviern ed ina durant la stad.
RR actualitad 17:00