Siglir tar il cuntegn
cuntegn

Engiadina 20 onns Posta Ladina – «In sustegn da cor per la lingua»

Lezza giada n'avessan forsa betg blers pensà che la part rumantscha en l'Engadiner Post vegn ad avair in tal success. Ils 5 da december 1996 era cumparida l'emprim'ediziun cun ina pagina rumantscha. Oz èn quai mintg'emna duas fin trais paginas. La gasetta bilingua ha success en Engiadina.

Quai fetschia natiralmain losch, di la schefeditura Myrta Fasser. Ella è sezza da la partida dapi il cumenzament da l’istorgia da la Posta Ladina. La naschientscha è sa dada or dal fatg ch'il «Fögl Ladin» aveva annunzià da betg pli edir. L'editur da l'Engadiner Post da quella giada, Walter Urs Gammeter, ha reagì è mess en pe la Posta Ladina – cun success. La gasetta bilingua saja bainvesida ed appreziada en la val, di Myrta Fasser.

Ella era l'emprima producenta da la Posta Ladina e n'aveva sco tala betg adina simpel. Gist a l'entschatta da procurar per la qualitad dals artitgels giavischada da la chasa editura saja stà ina sfida, perquai che betg tut ils schurnalists vulevan acceptar ina giuvna da 20 onns che redigia tuttenina ils texts.

Era grazia a questa pretaisa a la qualitad saja la gasetta oz dentant quai ch'ella è, manegia Myrta Fasser.

RR actualitad 08:00