Siglir tar il cuntegn
cuntegn

Engiadina 14'000 sin la Idalp ad Ischgl/Samignun per tadlar Muse

Ils rockers englais han dà in concert fulminant sin passa 2300 meters sur mar per la fin da la stagiun da la Silvretta arena dad Ischgl/Samignun.

Muse durant il concert
Legenda: Muse avant 14'000 persunas sin la Idalp ©TVB Paznaun-Ischgl
La band Muse
Legenda: La band da rock englaisa Muse sin la Idalp ©TVB Paznaun-Ischgl

Success per la fin da stagiun d'enviern en la Silvretta arena dad Ischgl/Samignun. 14'000 persunas han visità il concert da la band englaisa Muse. Ils rockers englais han dà in concert fulminant. Els han sunà en vestgadira da skis. Ils concerts da primavaira ad Ischgl / Samignun han tradiziun. Mintg'onn sunan bands da renum mundial sin las tribunas da l'Idalp e da l'alp Trida. Robbie Williams è stà qua, sco era Elton John, Jon Bon Jovi u Ami Mac Donald per numnar be in pèr. Ils concerts duain render attent ad in public pli grond sin il fatg che Ischgl e Samignun han bunas pistas enfin il mais matg. Questa fin d'emna eran anc avertas 37 sutgeras e pendicularas.

Matthew Bellamy da Muse
Legenda: Matthew Bellamy, chantadur da Muse ©TVB Paznaun-Ischgl

"Franc svizzer è bun collavuratur"

Il directur da turissem da Paznaun Ischgl Andreas Steibl ha plaschair che blers da ses giasts derivan da la la Svizra. El sà che lieus sco Ischgl profitan dal franc svizzer che è fitg ferm. Il franc svizzer saja ses meglier collavuratur da marketing ha ditg Steibl envers Radiotelevisiun Svizra Rumantscha RTR. La Silvretta arena fetschia dentant era fitg buna lavur cun indrizs fitg moderns. Natiralmain che era la grondezza dal territori da skis cun passa 160 kilometers da pista è in trumf per Ischgl.