L'ultima sonda da la festa da giubileum da 100 onns Lia Rumantscha è il grond di da festa. E tar ina festa stget rumantscha tutga natiralmain in bal. Ed a quel bal sunan ils Fränzlis da Tschlin ensemen cun Carlo Simonelli ed Arno Caflisch dals Engadiner Ländlerfründa.
Il clarinettist da tuttas duas furmaziuns è Domenic Janett. El s'allegra bain sin il bal, suna dentant pli gugent concerts. Gia be pervi da la lunghezza da la saira, di l'um da 70 onns barbus cun in surrir.
Ils Fränzlis da Tschlin, ina «family affair»
La cumposiziun dals Fränzlis da Tschlin sa mida adina puspè, actualmain è ella ina affera da famiglia. Ils dus baps Curdin e Domenic e lur figlias Cristina, Madlaina ed Anna Staschia. La pli giuvna è la figlia da Domenic, Anna Staschia.
Quai è propi fitg bel da sunar cun ella tar ils Fränzlis.
Sch'il bap saja il pli grond criticher ni il pli grond fan na sa Anna Staschia betg propi respunder, mo tant: la pli gronda criticra saja la mamma.
Da pudair far musica cun ils Fränzlis giauda ella era fitg, era senza esser musicista da professiun. Anna Staschia studegia medizina.
Jau stoss planisar bain il far musica - ma sch'ins vul far musica va quai era sper il studi.
Da far musica cul bap, il barba e las duas cusdrinas saja flot, bel e fitg natiral. Els na stoppian betg discurrer in cun l'auter di Anna Staschia, quai fatscha enorm bler plaschair.
RR actualitad 12:00