Musica e teater, prelecziuns e laudatio. Il program da festa per l'anniversari da 100 onns da Cla Biert en la sala communala a Scuol è stà vast. Ed ha mussà bleras fassettas dal scriptur, trubadur ed actur.
En in rom festiv, pervia dal coronavirus dentant era in pau steri, è vegnì regurdà a la persuna Cla Biert.
Tipic per mes bab è stada l'expressiun «mobain» ni perfin «mobain, quai n'è betg uschè nausch» e quai mussa per mai il pli bain co el è stà sco persuna.
Regurdà è dentant era vegnì a l'ovra dal scriptur. Saja quai cun prelecziuns da ses texts, cun interpretaziuns da tals ni cun sviluppar els en furma da rima. Quai ch'ils scolars da la 5 e 6avla classa da Sent han fatg.
Regurdientschas a Cla Biert
Blers dals bundant 170 giasts da festa n'han betg pli regurdientschas persunalas a Cla Biert. Per l'ina perquai ch'el è mort gia dal 1981, per l'auter perquai ch'el ha vivì ditg a Cuira. Quels ch'han enconuschì el sa regordan dad in um modest cun umor ed ina vusch sonora. Ed ils auters manegian, ch'ins haja enconuschì el, savì tgi ch'el saja e legì ses texts.
