Siglir tar il cuntegn
cuntegn

Grischun Discussiun tar No Billag sparta las uniuns da commerzi

Tar pliras uniuns d'artisanadi e mastergn regiunalas en il Grischun èn las opiniuns fitg differentas. Tschertas, uschia era quella da Cuira, na dattan perquai betg ora ina parola per la votaziun. Autras uniuns, sco quellas da l'Engiadin'Ota e Breil e conturn èn cunter l'iniziativa.

Quen da Billag simbolic
Legenda: Il tema Billag sparta era las opiniuns da las uniuns da commerzi regiunalas. Keystone
  • L'Uniun grischuna d'artisanadi e mastergn ha decidì la parola per l'iniziativa. Els proponan da dir «gea».
  • Las uniuns regiunalas da Cuira, Landquart, San Murezzan e Surses na dattan ora nagina parola.
  • L'uniun da Breil e conturn è cunter l'iniziativa, l'uniun Engiadina Bassa n'ha anc betg decidì, vegnia dentant fitg probabel era a dar ora la parola cunter la No Billag.

En pliras uniuns d'artisanadi e mastergn regiunalas ha l'iniziativa No Billag procurà per grondas discussiuns. Tar l'uniun da commerzi da Cuira eran las opiniuns uschè differentas, ch'ins ha decidì da betg tractandar il tema e da betg dar ora ina parola uffiziala. Il medem vala per San Murezzan, era là van las opiniuns entaifer l'uniun ferm in ord l'auter. A Landquart sajan ins tenor il president da l'uniun Lorenz Felix en general precaut cun prender posiziun tar temas politics. E l'uniun da commerzi Surses e conturn s'exprima sulet tar temas regiunals e locals.

Nus avain entaifer l'uniun ferms aderents da l'iniziativa dentant era clers adversaris.
Autur: Michael Pfäfflipresident uniun da commerzi San Murezzan

L'uniun da commerzi Breil e conturn ha dà ora il december passà la parola «na» a No Billag. L'uniun da l'Engiadina Bassa decida il favrer. Tenor il president Claudio Andry vegnia probablamain a dar in «na» tar l'iniziativa.

Critica vers l'uniun chantunala

Tant da l'uniun da commerzi Engiadina Bassa sco era da l'uniun da Breil e conturn vegn la posiziun da l'uniun chantunala crititgada. Claudio Andry da l'uniun da l'Engiadina Bassa ha crititgà che l'uniun n'haja betg prendì resguard sin ils basegns dal chantun triling. Il president da l'uniun chantunala Urs Schädler manegia dentant, ch'els cumbattian da principi novas taxas per firmas. Uschia saja questa parola mo consequenta.

RR actualitad 12:00