Siglir tar il cuntegn
cuntegn

Grischun «Davoser Zeitung» en la critica

Il Cussegl svizzer da la pressa crititgescha la «Davoser Zeitung» perquai ch'ella ha violà las reglas da transparenza avant la votaziun da gieus olimpics il favrer 2017.

dz Davoser Zeitung
Legenda: La Davoser Zeitung, la gasetta locala da Tavau cumpara dapi il 1986 anc duas giadas ad emna. RTR

La Davoser Zeitung n'aveva tar ina seria d'intervistas betg marcà il logo dals aderents sco inserats. Il Cussegl svizzer da la pressa suppona plinavant ch'i saja vegnì pajà las intervistas cun sportists. Vitiers n’ha la gasetta betg declerà correctamain in supplement ch’ha fatg reclama per ils gieus olimpics. Il Cussegl svizzer da la pressa renconuscha uschia parzialmain ina reclamaziun dals politichers Walter von Ballmoos e Philipp Wilhelm.

Er Somedia vegn crititgà

Ils dus politichers crititgeschan era la «Somedia». Quella haja sco bunamain monopolist betg resguardà avunda omaduas varts, pia aderents ed adversaris dals gieus olimpics. «Somedia» e la gasetta han dentant fatg valair ch'els hajan era publitgà blers artitgels d'adversaris. Il Cussegl svizzer da la pressa na vul dentant betg sustegnair questa pretensiun, fa dentant attent ch'i saja tant pli impurtant per ina tala chasa da medias cun posiziun da monopol da laschar vegnir al pled omaduas partidas.

RR novitads 12:00