Dal matg enfin l'october ha il Grischun dumbrà en tut 2,2 milliuns pernottaziuns. Quai èn 122'000 dapli che la stad avant in onn ubain in augment da 5,9%. Tenor las cifras da l'Uffizi federal da statistica han las destinaziuns da Cuira, Tavau/Claustra, Val e Flem/Laax nudà ils pli gronds augments.
Dapli esters e dapli Svizzers
Profità da l'augment han tut las 13 regiuns turisticas. En tut ha la hotellaria svizra nudà la stad 2017 21,3 milliuns pernottaziuns. Quai è in plus dad 1,2 milliuns pernottaziuns. La cumpart da turists da l'exteriur è s'augmentada per varga 7% sin 12,1 milliuns. Quai èn 7,3% dapli che l'onn passà.
Il pli fitg èn las dumondas da turists da l'America s'augmentadas, numnadamain cun 154'000 pernottaziuns dapli (+12,7%) ch'en il il medem temp dal 2016. Però era ils giasts asiatics èn cun in plus da 12,5% ed ils giasts da l'India cun in plus dad 11,8% responsabels per il surpli. Il dumber da pernottaziuns da giasts svizzers è medemamain creschì per 356'000, quai che munta ad in plus da 4%.
RR novitads 10:00