Siglir tar il cuntegn
cuntegn

Grischun Dapli dischoccupads en Grischun e damain en Svizra

Sco quai che l'Uffizi per industria, mastergn e lavur dal Grischun scriva ha il chantun registrà il mais passà 1'166 persunas dischoccupadas. Quai è ina quota da dischoccupaziun da 1,1%. Cumpareglià cun l'avust è il dumber s'augmentà per 120 persunas.

Legenda:
Dumber da dischoccupads: Cliccar sin ils onns per activar e deactivar las lingias per cumparegliar la dischoccupaziun da differents onns Cifras da l'Uffizi d'industria, mastergn e lavur GR (2002-2018; stan 08-05-2018)

Da las 1'166 persunas senza lavur eran 583 dunnas e 583 umens. La pli gronda quota da dischoccupaziun ha la restauraziun (279) nudà, il commerzi en detagl (119), sanadad e fatgs socials (99) e l'industria da construcziun (98). Il settember è vegnì dumbrà 64 dischoccupads da lunga durada. Cumpareglià cun il mais avant cun 57 dischoccupads da lunga durada è questa cifra s'augmentada.

Damain dischoccupads en Svizra

Il settember eran en Svizra pli paucas persunas senza lavur. En total han ils centers d'intermediaziun da lavur registrà il settember 133'000 persunas dischoccupadas, 2'400 pli pauc che l'avust. Uschia communitgescha il secretariat da stadi per l'economia SECO. La quota da dischoccupaziun è restada sin 3,0%.

Cumpareglià cun il settember 2016 è il dumber da persunas senza lavur sa sminuì per bunamain 7% u 9'500 persunas. Era la dischoccupaziun tar ils giuvens è sa sminuida il settember marcantamain.

RR novitads 08:00