Siglir tar il cuntegn

Header

video
Dieta da traffic plaun
Or da Telesguard dals 04.10.2022.
laschar ir. Durada: 2 minutas 55 Secundas.
cuntegn

Cun velo, a pe u sin rodas Tgi che va plaun – va saun

Ir cun velo, a pe, sin rodas e quai tut mess en moviment cun la forza dals musculs – quai è il traffic plaun. Gist il boom da velos e l'impurtanza dal traffic plaun en connex cun emissiuns da CO2 chaschunan adina puspè motiv per discussiuns, conflicts, svilups e novas ideas.

Novs inputs, barats, infurmar davart novs projects – per far quai ha il Post per il traffic betg motorisà dal chantun Grischun clamà ad ina dieta davart il traffic plaun. Cun divers referats è vegnì tematisà:

  • il futur dal traffic plaun
  • nua ch'il traffic plaun stat oz
  • co far gust a la populaziun da sa mover en il mintgadi

Il Post per il traffic betg motorisà datti gia dapi 15 onns en il Grischun ed el surpiglia pliras incumbensas: Coordinar la planisaziun, construcziun e signalisaziun dal traffic betg motorisà. Per quai intent collavura el cun vischnancas e regiuns per ina rait da vias per il traffic plaun. Plinavant s'occupa il post cun dumondas da contribuziuns e defenda ils interess dal traffic plaun en conflicts cun autras infrastructuras.

audio
Traffic plaun: Nua stat il chantun Grischun?
ord Actualitad dals 06.10.2022.
laschar ir. Durada: 3 minutas 35 Secundas.

Manar ensemen las partidas cun medems interess

La dieta da traffic plaun duai cunzunt porscher a vischnancas ed a tut las organisaziuns ed ils pertutgads ina rait per sa barattar. Pertge savens han las differentas partidas sumegliantas sfidas en il connex cun il traffic e pon profitar da la savida e la discussiun.

Cunzunt en las destinaziuns grondas vegn il traffic plaun promovì sco motor per il turissem. Dentant er il traffic plaun dal mintgadi duai vegnir promovì vinavant. Il Post per traffic betg motorisà promova actualmain cunzunt la rait da vias da velo. In dals projects è per exempel in program d'aglomeraziun enturn la citad da Cuira.

Tgi che va plaun va saun

Era per l'uffizi da sanadad è la promoziun dal traffic plaun d'interess. Per che la populaziun sa mova dapli e fa uschia era dapli per la sanadad stoppia il traffic plaun esser uschè attractiv sco pussibel.

audio
L'influenza dal traffic plaun sin la sanadad
ord Actualitad dals 06.10.2022.
laschar ir. Durada: 3 minutas 8 Secundas.
Il traffic plaun è in impurtant sectur sch'i va per la promoziun da sanadad. Perquai dovri dentant la dretga infrastructura ch'è segira.
Autur: Hanspeter Brigger Uffizi per sanadad

L'uffizi da sanadad analisescha adina puspè la situaziun ed ils da basegns en las vischnancas. Perquai ha mintga vischnanca ina persuna ch'è responsabla per la promoziun da sanadad e per la prevenziun.

Traffic plaun en il futur

audio
L'influenza dal traffic plaun per l'avegnir ed il clima
ord Actualitad dals 06.10.2022.
laschar ir. Durada: 3 minutas 42 Secundas.

Era tge che pertutga il futur vegn il traffic plaun anc a giugar in'impurtanta rolla. Cunzunt en connex cun la midada dal clima. Dapli traffic plaun, damain traffic motorisà e damain emissiuns da CO2. Dentant uschè simpel n'èsi betg da midar davent da traffic motorisà tar ina gronda part traffic betg motorisà, quai conceda era l'expert Thomas Sauter-Saerves ch'è perscrutader per mobilitad e maina il studi per sistems da traffic a la scola auta turitgaisa per scienzas applitgadas. El è da l'opiniun ch'ina midada stoppia capitar tant pli svelt, ma midar disas dals umans n'è betg uschè simpel, quai dovria temp.

RTR actualitad 17:00

Artitgels legids il pli savens