Siglir tar il cuntegn
cuntegn

Grischun Cun skis da tutt'aura

La lieur da Pasca ha purschì in potpurri d'aura. La sonda hai navì mordio, il glindesdi esi stà fina bell'aura. Ma tuttina tge aura ch'i ha fatg, la glieud è ida sin las pistas grischunas.

Legenda: Tadlar il audio Bunura: Cun skis da tutt'aura. Durada 03:28 minutas.
03:28 min, Actualitad dals 03.04.2018.

I naiva, i ha tschajera enfin giu sin il palantschieu, e tuttina spetgan in pèr tozzels persunas la sonda damaun sin la pendiculara a Mustér. Las raschuns èn differentas. Tgi ha trenament dad JO, tgi sa legra sin la naiv nova e tgi n’ha betg anc gì avunda da la stagiun.

Era a Sursaissa vegn ì cun skis, da tutta mal’aura. Perquai che las pistas sajan tuttina bellas, perquai ch’ins haja gia cudeschà las vacanzas u per ch’ils uffants vegnian stanchels.

Bell’aura sco regal da la lieur da Pasca

Il glindesdi sontg ha la lieur lura pachetà ora il grond regal, fina bell’aura cun temperaturas chaudas. Era da quellas relaziuns bunamain da stad ha la glieud anc gust dad ir cun skis. Era Angela Hendry ha vulì savair schebain i renda d’ir cun skis la fin da la stagiun.

I ha glieud sco mustgas sin las pistas da Lai ed Arosa. La glieud sa legra da la massa naiv, da las bellas pistas, da las temperaturas chaudas. I dat schizunt persunas ch'han gugent naiv greva, naiv marscha. Sch’i saja ina giada bel questa stagiun, lura stoppian ins nizzegiar la chaschun dad anc ir ina giada sin la pista, sur tut tar questas massadas naiv, raquintan ils giasts intgantads.

La pendiculara che collia il territori da skis da Lai cun quel d'Arosa.
Legenda: La pendiculara Urdenbahn che collia ils territoris da skis da Lai ed Arosa. Angela Hendry

RR actualitad 07:00