Siglir tar il cuntegn

Grischun Critica a Cuira - els gudognan tuttina dapli che 200‘000

Ils regents da la citad han 15’000 respectivamain 20’000 francs dapli paja che la populaziun ha permess. Quai rapporta il Sonntags Blick. Pussibel saja quest augment grazia a novas incumbensas pervi da la refurma da territori.

Ils 5 da zercladur avevan ils da Cuira reducì la paja da lur regenza sin 230'000 respectivamain 200'000 francs ad onn. Cun 6'411 cunter 3'853 vuschs ha il pievel approvà l'iniziativa correspundenta – ch’era vegnida lantschada da Beat Nay (anteriuramain PPS), commember dal parlament da Cuira senza partida.

Tuttina dapli paja per ils regents pervi da la refurma da territori

Uss ha publitgà il Sonntags Blick, che la regenza vegn a gudagnar il 2017 tuttina dapli che quai che la populaziun aveva permess.

En la refurma da territori ha la citad da Cuira survegnì da la regiun Plessur l’incumbensa, da survegliar tant l'uffizi da stadi civil e l'uffizi da scussiun e concurs sco era la curatella professiunala.Quell’incumbensa hajan ils trais regents surpiglià sez e quai encunter in’indemnisaziun da 15’000 respectivamain 20’000 francs, rapporta la gasetta.

Revocar la decisiun dad indemnisaziun vs. na betg far lavur gratuita

Cun quest agir n’è l’iniziant da l’iniziativa da reducziun da paja, Beath Nay, betg d'accord. Quest agir stoppia vegnir revocà, vegn el cità da la gasetta.

Il president da la citad da Cuira, Urs Marti, vesa quai auter. El e ses con-regents na vulevan betg exnum quell’incumbensa ed i saja cler, ch’els na fetschian quella betg gratuitamain. Uschia Marti envers il Sonntags Blick.

Era il professer per dretg da lavur Thomas Geiser da Son Gagl è da l’avis che quest reglament saja «fitg maladester» e ch’in plant «avess senz’auter schanzas da success» - uschia la gasetta.

RR novitads 16:00