Siglir tar il cuntegn
cuntegn

Grischun Corp da polizia interchantunal sustegn chantuns da cunfin

Ils policists dals chantuns Tessin, Valais e Grischun survegnan sustegn sur stad. In corp da polizia interchantunal duai gidar da controllar immigrants illegals.

Dus polizists da cunfin cun trais giuvenils esters da davosen.
Legenda: Polizia en il Tessin, il Valais ed il Grischun survegn sustegn per far frunt a la migraziun illegala. Keystone

L’ultim onn èn ils chantuns Tessin, Valais e Grischun sco era la Svizra Orientala stads confruntads cun in grond dumber d’immigrants illegals. Perquai duai ussa in corps da polizia interchantunal gidar ora sur stad. Quai ha communitgà la conferenza dals cumandants da polizia chantunals.

Era questa stad fan las autoritads puspè quint cun immigrants illegals al cunfin svizzer. En in emprim pass duain perquai fin 50 policists da tut la Svizra sustegnair ils policists en il sid da la Svizra. Il persunal supplementar duai per exempel gidar tar controllas da persunas sin las vias da transit principalas, en staziuns da tren ubain sin autostradas.

Il cumandant da la Polizia chantunala grischuna, Walter Schlegel, beneventa la decisiun da la conferenza dals cumandants da polizia chantunals. Persuls na fissan els numnadamain betg abels da far frunt ad in grond dumber da migrants illegals als cunfins da las vals dal sid dal Grischun.

Quant prest ch’il Grischun vegn a stuair dumandar per agid lascha il cumandant avert. Far diever dal contingent po el en tutta cas tranter mez fanadur e mez october.

RR actualitad 17:00