Speziala n'è la nova punt d’autos a Schluein betg pervia da sia lunghezza da 20 meters, mabain pervia da la moda da construir ella. Per evitar da stuair manar l’entir traffic tranter Glion e Cuira per in lung temp mo sin in vial, han ins decidì da construir la nova punt 12 meters dasper la punt existenta. Cura che la platta da la nova punt è betunada e pronta, vegn la veglia spazzada. E cun agid da pressas idraulicas vegn la nova punt alura stumplada a ses plaz final.
Construir tenor quest principi n'è dentant nagina premiera. Questa metoda vegn però duvrada pli savens tar la viafier per evitar pli lungas interrupziuns. Ma cunquai che la punt è amez Schluein e frequentada fermamain, ha l’uffizi da construcziun bassa decidì d'era far diever da questa metoda da construir per la punt.
6 meters en ina notg
Betunada vegn la nova punt gia en in’emna. Cun spustar la punt spetgan ins dentant fin proxim avrigl. Lura vegn spazzada la mesadad da la veglia punt per preparar il fundament. Durant quel temp vegn il traffic manà mo sin in vial. Silsuenter vegn la nova punt spustada a questa mesadad libra. En quai mument vegn il traffic svià sur la nova punt. Uschia pon ins disfar l’autra mesadad da la punt veglia e betunar ils fundaments che mancan. Per che la nova punt possia lura vegnir stumplada ils ulteriurs sis meters enfin ses plaz final, vegn alura l’entira via serrada per ina notg.
TR Telesguard 17:40