Arno Jehli (68) è musicist, cumponist e dirigent e suna dapi 50 onns sin ils palcs en tut il mund. El vaglia dapi 50 onns sco garant per musica tradiziunala grischuna, scriva il comité da la clav da violina d'aur en sia communicaziun.
Fundatur da la chapella Oberalp
Dal 1968 ha Arno Jehli fundà la chapella Oberalp. Ensemen cun ella vala el sco icona da la musica populara. Ils musicants han fatg diversas turas da concerts en tut ils pajais dal mund. Vinavant han els adina puspè cumbinà la musica grischuna cun auters stils – uschia èn da chattar tar la chapella Oberalp per exempel sper chanzuns classicas musica populara dal Peru.
En 50 onns fatg passa 50 portatuns
Sper radund 150 concerts ad onn ha la furmaziun dad Arno Jehli er fatg bleras registraziuns. En 50 onns ha ella producì dapli che 50 portatuns, quatter da quels han perfin survegnì aur. Ils 15 discs cumpacts cun «Lumpeliedli» ch'Arno Jehli ha edì ensemen cun Carlo Brunner valan oz sco classichers.
«Sch'in musicant è sur uschè lung temp activ, sche lura haja el en mintga cas merità il premi» ha ditg il comité dal premi durant sia radunanza generala. La surdada dal premi ad Arno Jehli è ils 13 d'october 2018.
«Oscar da la musica populara»
La clav da violina d'aur è il premi il pli impurtant tar la musica populara. Dal 1979 è vegnida fundada l'uniun che surdà il premi. La mira è d'undrar persunas ch'èn fitg activas tar la musica populara, musica instrumentala u tar chors da jodladers. Ils premiads na survegnan nagins raps, per la paja in diplom ed ina gluvetta.
Tranter ils premiads sa chattan er Dani Häusler (2017), Carlo Brunner (2012) e – sco emprim Grischun onurà – Domenic Janett (1991).
RR Novitads 18:00