Siglir tar il cuntegn

Header

Video
Bilantscha da la chatscha 2015
Or da Actualitad video dals 01.10.2015.
laschar ir
cuntegn

Grischun Chatscha 2015 - Brosi fa bilantscha positiva

Georg Brosi, l’inspectur da chatscha chantunal fa ina bilantscha positiva da la chatscha 2015. Cifras exactas n’ha el anc betg, la chatscha da tschiervs e chavriels saja dentant stada buna. Quella da chamutschs strusch sco ils onns passads, ha ditg Brosi ad RTR.

La chatscha da tschiervs è stada spezialmain buna en la Surselva, en il Partenz, en il Grischun Central ed er en la Tumleastga. Là deva quai er fitg blers tschiervs ed i è stà necessari da sajettar quels. En las autras regiuns è la chatscha da tschiervs stada en la media dals ultims onns.

Malgrà che la chatscha è stada buna èsi dentant er quai onn necessari da far ina chatscha supplementara. Cunzunt er perquai ch’il dumber da tschiervs è quest onn extraordinari auts cun 16’000 tschiervs dumbrads la primavaira. Perquai èsi stà necessari da sajettar durant l’entira chatscha bunamain 5000 tschiervs. Quai dumber n’è anc betg cuntanschì, uschia Georg Brosi.

Vis lufs ed urs

Ils chatschaders Grischuns han durant la chatscha er vis bler. Tranter auter lufs e quai en l’entir Grischun. Per il solit saja quai lufs singuls ch’èn en viadi uschia Brosi. Sper quai han chatschaders er vis dus urs, in datiers da Seraplana ed in en la Mesolcina. Pia omadus en la regiun da cunfin cun l’Italia. Tgenins urs che quai è stà e nua ch’els èn uss n'ha Georg Brosi betg pudì dir.