Siglir tar il cuntegn
cuntegn

Chantun Xi Jinping avra il WEF ensemen cun Doris Leuthard

Sco usità ha la presidenta da la Confederaziun Doris Leuthard tegnì ils emprims pleds a l’avertura dal WEF. Il president da la China Xi Jinping ha dentant prendì davent tut la show a nossa cussegliera federala.

Xi Jinping drizza ses pleds a l'elita da l'economia.
Legenda: Xi Jinping drizza ses pleds a l'elita da l'economia. Keystone

Jinping è arrivà a Tavau cun in empr, convoi e cun la pli gronda delegaziun dapi 40 onns. Ed igl è era ina premiera: Per l'emprima giada è in president da la China al WEF. I saja ina grond’onur ed in privilegi da pudair beneventar il president da la China al WEF, di il bab dal congress Klaus Schwab. L’invit haja el gia tramess avant dapli ch'in onn.

Xi Jinping descriva il WEF sco grond brainstorming en ina bella e pitschna vischnanca en las muntognas. El descriva il WEF era sco impurtant lieu per contemplar la situaziun da l’economia e per engrondir l'orizont.

Adressà ils problems da noss temp

In temas ch’il president da la China sco era Doris Leuthard han menziunà èn ils problems actuals da noss mund: Terrorissem, conflicts e fugitivs. I saja in temp en il qual i dettia bleras cuntradicziuns.

D’ina vart creschia il bainstar e la tecnologia sa sviluppeschia di per di. Da l’autra vart daventia la differenza tranter ritg e pover però adina pli gronda. La globalisaziun saja ina causa che pudess schliar ils problems, di Jinping entant che auters dattan la culpa a la globalisaziun per ils problems.

Dentant na stoppian ins betg avair tema da problems. Ins stoppia empruvar da schliar els. Precis ord quest motiv sajan ins a Tavau: Per far brainstorming e per empruvar da chattar soluziuns per ils problems mundials.

RR actualitad 12:00