Siglir tar il cuntegn
Inhalt

Chantun WWF è d'accord cun autoritads: M75 sto davent

L'organisaziun per la natira e l'ambient desista da far recurs cunter la decisiun da las autoritads. Il luf M75 ha stgarpà memia bleras nursas e po vegnir sajettà. Er il WWF è da quest avis e desista or da quai motiv da far recurs cunter la decisiun da las autoritads.

Purtret d'in luf.
Legenda: Il luf M75 ha stgarpà passa 40 nursas en be paucs dis. Quai tanscha per sajettar el. Keystone

Passa 40 nursas aveva il luf M75 che deriva da l'Italia stgarpà e quai tranter ils 21 da schaner ed ils 8 da favrer en il sid dal Grischun e la Leventina. Il WWF è vegnì tar la conclusiun ch'i na dettia nagut auter che da sajettar il luf. Sulet il dumber dals animals stgarpads en Grischun tanschess per ordinar da laschar sajettar el. Il WWF crititgescha dentant fermamain las mesiras da protecziun da muntaneras en il chantun Tessin. Là dettia anc potenzial per megliurar.

Tenor ordinaziun federala pon animals stgarpants vegnir sajettads sch'i fetschian donns considerabels er sche mesiras da protecziun da muntaneras sajan avant maun. Uschia in donn è il cas sch'il luf mazza almain 25 animals da niz entaifer in mais.

Siglì 113cm sur ina porta d'ina stalla

M75 n'è betg mo crudà si perquai ch'el ha stgarpà uschè bleras nursas, mabain sur tut pervia da sia moda e maniera da proceder. A Trun è il luf numnadamain siglì sur ina porta stalla da 113cm autezza. Cletg en il discletg ha il pur gì en lezza situaziun. Il luf ha stgarpà be ina nursa. Forsa saja el vegnì disturbà.

Il luf M75 para d'esser in schani malruassaivel e viandant. El para da fa senza problems viadis pli lungs. El n'è betg mo viandà tras la Svizra dal sid e sidost. Er en il chantun Turitg han ins chattà ses fastiz genetic. Suenter è el stà en la Turgovia. Adina èn nursas daventadas si'unfrenda.

Il mument saja el para puspè turnà en Grischun. Ils ultims fastizs hajan ins chattà a Langwies, en il Scanvetg. L'ordinaziun per sajettar il luf, da total 60 dis vala anc radund in mais.

RR novitads 16:00