Grischunas e Grischuns sustegnan la midada dal maiorz al proporz dubel per eleger deputadas e deputads dal Cussegl grond. Igl è stà ina clera decisiun cun 78,88% da las vuschs e cun il sustegn da tuttas vischnancas.
Il pli grev stan ha la midada giu en Surselva - dentant schizunt là ha il nov sistem electoral survegnì 71% da las vuschs - cunzunt en la Cadi hai dà intginas vuschs NA al la midada - quellas n'han dentant per bler betg tanschì. Il pli cler GIE hai dà or da la regiun Plessur - la Citad da Cuira ha sustegnì cun var 85% la midada da la lescha.
Regenza è levgiada
La regenza dal chantun è levgiada cun la decisiun dal suveran, di il Cusseglier guvernativ Christian Rathgeb.
Igl era cler ch'il chantun stoppia midar ses sistem electoral, ch'i saja dentant gartegià questa giada saja in grond levgiament. Previs è d'eleger tenor il proporz dubel gia il matg 2022 deputadas e deputads dal Cussegl grond.
Il proporz dubel
La situaziun da partenza era clera: il chantun Grischun sto adattar ses sistem d'eleger. Il maiorz, che valeva enfin qua, cuntrafa per part a la Constituziun federala tenor ina sentenzia dal Tribunal federal. Auter che la PCD - che ha dà liber la vusch - han tut las partidas grischunas sustegnì l'introducziun dal proporz dubel.
Ina lunga istorgia
Ch'il Grischun banduna il sistem dal maiorz è ina decisiun istorica.
