Siglir tar il cuntegn

Header

Navigaziun

Legenda: Tadlar il audio Bunura: Co è la chatscha speziala sa sviluppada?. Durada 03:31 minutas.
03:31 min, Actualitad dals 09.05.2019.
cuntegn

Votaziuns L'istorgia da la chatscha speziala

La lescha da chatscha e la chatscha speziala è reglada dapi l'onn 1986, pia dapi 33 onns. L'origin da la chatscha speziala va dentant anc pli lunsch enavos.

Emprimas acziuns da chatscha speziala hai gia dà ils onns 1950. Lura eran las acziuns dentant plitost curtas ed il dumber da selvaschina betg limità. La chatscha speziala en la furma dad oz datti dapi l'onn 1972. Il lieu d'origin da la chatscha speziala è la regiun dal Parc Naziunal Svizzer. Là devi memia blers tschiervs. Cunquai che quels na survivevan betg l'enviern, han ins stuì reagir. In concept ecologic dueva proteger ils tschiervs ed eruir quants tschiervs ch'i deva insumma. Uschia è la chatscha speziala sa sviluppada.

Ir a chatscha speziala aveva in schlet renum

La chatscha speziala sin basa giuridica datti dapi l'onn 1986. Lura è la lescha da chatscha en il chantun Grischun vegnida introducida. L'entschatta aveva la chatscha speziala dentant in schlet renum perquai ch'ins temeva ch'i dettia memia pauca selvaschina.

Iniziativa cunter la chatscha speziala gia il 1993

Gia l'onn 1993 è vegnida inoltrada in'iniziativa che vuleva abolir la chatscha speziala – quai davart l'Uniun grischuna da chatscha e protecziun da natira. L'iniziativa è vegnida il 1995 avant il Cussegl grond. Quel ha lura decidì cun gronda maioritad ch'ella saja nunvalaivla, perquai ch'ella cuntrafetschia al dretg federal. Ils iniziants han acceptà questa decisiun e n'han betg tratg vinavant ella.

RR actualitad 07:00