Passa 5 onns e mez suenter che l'iniziativa è vegnida inoltrada vegn ella en votaziun ils 19 da matg: L'iniziativa che vul abolir la chatscha speziala.
Ils arguments dals iniziants
Tar ils iniziants sa tracti dad ina gruppa da persunas privatas enturn Christian Mathis – sez chatschader ed anteriur deputà da la PPS en il Cussegl grond. Els vulan abolir la chatscha speziala ed enstagl regular il dumber da selvaschina durant la chatsch’auta. Per cuntanscher quai duai la chatsch'auta
- durar maximalmain 25 dis (e betg mo 21 dis)
- avair lieu il settember e l’october (e betg mo il settember)
- esser a fin il pli tard l'emprim da november
- avair pliras pausas da chatscha (enstagl da mo ina)
I saja numnadamain pussaivel da sajettar avunda selvaschina – senza chatscha speziala. Plinavant proponan ils iniziants da simplifitgar las prescripziuns durant chatsch'auta e da reducir ils asils (territoris nua ch'igl è scumandà da sajettar selvaschina).
In ulteriur argument è ch'i dettia durant la chatscha speziala scenas eticamain inacceptablas: Entant ch'igl è per exempel scumandà da sajettar vatgas-tschierv che dattan latg a lur vadels durant chatsch'auta – èsi gist giavischà che quellas vegnian sajettadas durant la chatscha speziala.
L'aboliziun da la chatscha speziala pudess avair per consequenza ch'i duvrass ina chatscha da reschia – quai menziuna il Tribunal federal en sia sentenzia dal november 2017. Ils iniziants dentant sa distanzieschan d'ina tala chatscha per il Grischun.
Ils arguments da regenza e parlament
L'iniziativa saja da refusar, pertge senza ina chatscha speziala na saja betg pussaivel da reducir la selvaschina. Quai è l'argument principal dal cusseglier guvernativ Mario Cavigelli (PCD) e da la maioritad da deputadas e deputads dal Cussegl grond. E da reducir la selvaschina saja impurtant per
- avair in effectiv dad animals sauns
- reducir ils donns vid ils guauds
- minimar ils accidents d'auto cun selvaschina
In ulteriur argument dals adversaris: I dovria la chatscha speziala perquai ch'in grond dumber da tschiervs bandunia la primavaira il Grischun vers l'exteriur e turnia pir il november puspè en lur territoris d'enviern. Cunquai saja pussaivel da sajettar questa selvaschina pir il november e december.
Ina chatscha da reschia valitescha la regenza grischuna sco grev da realisar en il Grischun – era perquai che quai muntass dapli persunal e dapli daners.
Parolas tar l'iniziativa cunter la chatscha speziala
| Gea | PEV |
| Na | PLD, PCD, PBD, PVL, PS, Cussegl grond |
| Libertad da votar | PPS |
RTR votaziuns