Siglir tar il cuntegn

Header

video
La chatscha grischuna resta sco fin uss
Or da Telesguard dals 13.06.2021.
laschar ir. Durada: 2 minutas 30 Secundas.
cuntegn

Chatscha etica L'iniziativa n'ha gì nagina schanza

L'iniziativa per ina chatscha etica che sa cumporta cun la natira ha a la fin giu nagina schanza. La populaziun Grischuna di cler NA a la chatscha etica.

El haja spetgà cun questa clera decisiun, di il cusseglier guvernativ Mario Cavigelli. L'iniziativa saja stada memia radicala, ma tuttina, er la chatscha grischuna stoppia sa sviluppar vinavant. En il futur stoppian ins quintar cun midadas per la chatscha. Da gliez avis è era l'inizianta Marion Theus. Ella vegnia ad observar co la chatscha sa sviluppeschia. Co vinavant dapendia tenor Theus dentant dals chatschaders e da la politica.

audio
Las reacziuns politicas sin la decisiun
ord RTR Audio dals 13.06.2021. Maletg: RTR
laschar ir. Durada: 2 minutas 54 Secundas.

Tuttas vischnancas èn stadas cunter l'iniziativa

Ella ha sulettamain survegnì 21,05% da las vuschs e betg il sustegn dad ina singula vischnanca.

Iniziativa per ina chatscha etica che sa cumporta cun la natira

GEA 21.05%, Na 78.95%

Resultat 

Votantas e votants han per part tramiss l'iniziativa cun passa 90% da las vuschs da l'aua giu: uschia per exempel a Buseno, Sufers ed ad Avras. Il pli grond sustegn ha l'iniziativa survegnì a Castaneda en la regiun Moesa. Insumma sa mussa, la regiun ha gì las pli bleras simpatias per l'iniziativa - dentant er qua hai dà en total be var 29% da las vuschs.

Funtauna votaziuns GR

Avrir la boxSerrar la box

RTR sa basa sin las datas che la Chanzlia chantunala dal Grischun metta a disposiziun. Quellas èn da chattar sin https://abstimmungen.gr.ch/, il link avra en ina nova fanestraavrir en il browser.

Tge vuleva l'iniziativa?

Ils iniziants vulevan ina chatscha etica che sa cumporta cun la natira. La chatscha grischuna dueva vegnir adattada al temp dad ozendi, per exempel cun resguardar las midadas da l'ambient, dals animals u il return dal luf. Regenza e Cussegl grond han refusà l'iniziativa.

Gia il 2016 aveva il parlament chantunal tractà l'iniziativa. En trais puncts ha el dentant declerà l'iniziativa sco nunvalaivla. Ils iniziants han suenter fatg dus recurs: In emprim recurs tar la Dretgira administrativa chantunala. Pli tard hai anc dà anc in segund recurs tar il Tribunal federal a Losanna. Quel ha declerà tut l'iniziativa sco valaivla. Uss è quest chapitel dentant istorgia – il suveran ha ditg cleramain na a l'iniziativa.

RTR novitads 12:00

Artitgels legids il pli savens