Siglir tar il cuntegn

Header

audio
Bunura: Pertge resta Vitus Huonder uvestg?
Or da Actualitad dals 23.04.2019.
laschar ir. Durada: 2 minutas 57 Secundas.
cuntegn

Chantun Vitus Huonder resta anc in amen

L'uvestg Vitus Huonder e la direcziun da l'uvestgieu restan en uffizi fin che la successiun per l'uvestg è sclerida. Quai ha communitgà il pledader da l'uvestgieu Giuseppe Gracia.

En sa sez eri cler che Vitus Huonder festagia a ses 77avel anniversari, la dumengia da Pasca, sia ultima messa. Durant quella messa è er vegnì piglià cumià dad el – dentant: El resta anc.

«Interpretaziun faussa dal dretg canonic»

L'argumentaziun da la baselgia: Sco quai che Giuseppe Gracia, il pledader da l'uvestgieu ha declerà il glindesdi da Pasca, saja vegnì interpretà fauss il dretg canonic.

Tenor quest dretg restia Huonder pia uschè ditg uvestg da Cuira enfin ch'igl è chattà u in successur u in administratur. Ed in nov termin per sia demissiun na saja betg anc definì.

video
Vitus Huonder resta anc en uffizi – l'uvestgieu argumentescha e fa renfatschas a las medias
Or da Telesguard dals 23.04.2019.
laschar ir. Durada: 3 minutas 14 Secundas.

Prolungaziun da la prolungaziun

Exact tenor lescha aveva Huonder fatg amogna al papa avant dus onns da demissiunar. Quella giada aveva il Vatican acceptà la demissiun, supplitgà dentant l'uvestg da Cuira da restar anc per dus ulteriurs onn. La demissiun era vegnida fixada per ses 77avel anniversair, ils 21-04-2019.

Uss è la data passada, ma Huonder resta tuttina.

Situaziun betg novissima

Nova n'è questa situaziun en sasez betg per l'uvestgieu da Cuira. Er l'antecessur da Huonder, l'uvestg Amedée Grab, aveva manà l'uvestgieu anc per 5 mais suenter ses 77avel anniversari, quai sco administratur apostolic. Huonder percunter resta uvestg da Cuira.

In successur vegn tschertgà

Enconuschent è ch'il nunzi apostolic Thomas E. Gullickson saja dapi l'entschatta da l'onn a la tschertga d'in successur per Vitus Huonder.

Sch'el haja dentant gia dà giu ina glista da candidats per la successiun a Roma na saja betg enconuschent, scriva il portal online kath.ch.

RR novitads 11:00

Artitgels legids il pli savens