Siglir tar il cuntegn

Chantun Vitus Dermont è il pli aut Grischun

Cun 109 da 110 vuschs e 8 cedels vids u nunvalaivels, ha il Cussegl grond elegì il cristiandemocrat Vitus Dermont sco nov president. Vitus Dermont da Laax è uschia fin l’avust dal 2016 il pli aut Grischun.

Legenda: Guardar il video «Vitus Dermont è il pli aut Grischun». Durada 2:00 minutas.
Or da Telesguard dals 26.08.2015.

Sco vicepresident han deputadas e deputads dal Cussegl grond elegì cun 100 da 102 vuschs e 16 cedels vids u nunvalaivels il liberaldemocrat Michael Pfäffli da Son Murezzan.

In bun resultat

Cun ses resultat arriva Vitus Dermont entamez ils resultats da la tscherna dal pli aut Grischun. Il meglier resultat dals ultims 15 onns aveva fatg l’onn 2000 Hansjörg Trachsel (da lezzas uras PPS) cun 117 vuschs e nagins cedels vids u nunvalaivels, quai che correspunda a 100% da tuts cedels (cun vids e nunvalaivels).

La PCD po esser cuntenta

Tranter ses collegas da la Partida cristiandemocrata ha Dermont dentant cuntanschì in dals megliers resultats dals ultims 15 onns. Elita Florin-Caluori era vegnida scritta sin 84,9% da tuts cedels en l’elecziun dal 2012, Corsin Farrér il 2008 sin 89,7%, e Hans Geisseler il 2005 sin 95,8%. Vitus Dermont ha cuntanschì 92.4%.

Pled d'avertura da Duri Campell

La sessiun dal Cussegl grond ha cumenzà cun il pled d’avertura dal president da fin qua, Duri Campell. Per el saja il presidi stà in punct culminant en sia carriera politica, ha Campell ditg. Durant quest temp ha Duri Campell visità 139 occurrenzas, e fatg passa 16’000 kilometers cun ses auto.

RR Novitads 15:00